Rwy'n Gymrawd Ymchwil yn Uned Ymchwil Arennau Cymru, sef partneriaeth ryngddisgyblaethol, Cymru gyfan a ariennir gan Ymchwil Iechyd a Gofal Cymru ar gyfer astudio diagnosis, atal, triniaeth a chyd-destun cymdeithasol clefyd yr arennau. O fewn y rôl hon byddaf yn datblygu ac yn cyflawni ymchwil i wasanaethau iechyd, ac yn datblygu capasiti a gallu ymchwil ymhlith nyrsys a gweithwyr proffesiynol perthynol i iechyd sy'n gweithio ym maes gofal arennau yng Nghymru.

Gan adeiladu ar fy ngyrfa glinigol mewn nyrsio arennau, mae fy ymchwil wedi canolbwyntio ar ofal arennau, yn enwedig dialysis peritoneaidd. Roedd fy PhD a ariannwyd gan RCBC Cymru yn ethnograffeg a oedd yn archwilio profiadau cleifion a theuluoedd o fyw gyda dialysis peritoneaidd (Baillie ac eraill 2012, Baillie a Lankshear 2014, Baillie a Lankshear 2015, Baillie 2018). Wedi hynny, roedd fy Nghymrodoriaeth Ôl-ddoethurol yn astudiaeth dulliau cymysg a oedd yn archwilio gwybodaeth a phrofiadau cleifion a theuluoedd o beritonitis sy'n gysylltiedig â dialysis peritoneaidd (Baillie ac eraill 2018, Baillie ac eraill 2021, Baillie ac eraill 2023). Yn ddiweddar, bûm yn cydweithio â phanel rhyngwladol o nyrsys arennau i gyd-ddatblygu dangosyddion sensitif i nyrsio ar gyfer nyrsio dialysis peritoneaidd, a gymeradwywyd gan Gymdeithas Nyrsys Dialysis a Thrawsblaniadau Ewrop (Baillie ac eraill 2025).  Rwy'n cyd-arwain Cymuned Ymarfer Ymchwil Cymdeithas Nyrsys Neffroleg (Baillie ac eraill 2025). Yn 2024, deuthum yn Olygydd Cysylltiol y Journal of Renal Care.

Rwyf wedi ymgymryd ag amrywiaeth o ymchwil ansoddol a dulliau cymysg sy'n cwmpasu cyflyrau hirdymor ac iechyd y cyhoedd. Rwyf wedi goruchwylio tri myfyriwr doethuriaeth hyd nes iddynt gwblhau eu hastudiaethau. Ar hyn o bryd rwy'n goruchwylio PhD Sarah McMillan, sydd wedi'i ariannu gan Kidney Research UK. Mae'n archwilio ffactorau risg ar gyfer cymhlethdodau wrth gael mynediad at ddialysis, a safbwyntiau cleifion ar gymhlethdodau. 

Yn flaenorol, roeddwn i'n Uwch Ddarlithydd (Nyrsio Oedolion) ym Mhrifysgol Caerdydd, lle roeddwn i'n addysgu, asesu a goruchwylio myfyrwyr israddedig, ôl-radd hyfforddedig ac ymchwil ôl-radd. Roeddwn i'n Arweinydd Modiwl ac yn Rheolwr Rhaglen, yn Is-gadeirydd Pwyllgor Moeseg Ymchwil yr Ysgol, ac yn Ddirprwy Arweinydd RCBC Cymru ar gyfer Prifysgol Caerdydd. Deuthum yn Uwch Gymrawd yr Academi Addysg Uwch yn 2021.